可以喺車內KTV，Tesla專屬Mic上線即日售罄

現時電動車嘅車內功能愈來愈豐富，既然可以喺車內聽歌，唱K呢個附帶功能應該唔難實現吧。早前已有內地車企利用5.1聲道、燈光技術等科技，打造車內KTV，而作為電動車龍頭企業Tesla當然唔會執輸，只要內地嘅Tesla車主更新車內系統至2022.2.1之後，配上專屬嘅TeslaMic配件，就可以喺車內高歌一曲啦。

而近日TeslaMic終於喺內地市場上市，令所有人意想不到嘅喺，配件上市未夠一日就被熱情嘅內地Tesla車主搶售一空，單款產品售價1199元人民幣絕對算唔上實惠，但不得不佩服內地車主為咗體驗新科技嘅行動力，非常踴躍。根據內地媒體報導，原來呢款貴價Mic貴起來當然有佢嘅道理，首先，TeslaMic採用無線Mic技術連環繞式收音，並且搭載DSP高性能芯片應對車內較為狹小嘅空間，讓車主嘅歌聲更加真實。除此之餘，Tesla最新嘅系統更新內亦包括對於車內影音系統嘅提升，讓車主喺車內享受音樂有更好嘅感受。