Porsche創子公司打造高性能電池

喺汽車電氣化時代，各大汽車品牌嘅性能之爭從未停止，而近日，Porsche投資千萬歐元，與合資夥伴Customcells喺德國成立高性能電池子公司Cellforce Group GmbH，目標為賽車同埋小部分高階性能車款打造全新高效能矽陽極電池，為品牌喺電氣化性能領域取得先機。Porsche希望通過Cellforce呢個項目喺歐洲建立一個具有競爭力嘅鋰離子電池生產價值鏈，從品牌十分注重嘅研發過程開始出發，打造Porsche品牌獨有嘅未來跑車，重新定義未來電氣化出行體驗。

根據官方資料介紹，新型高性能電池嘅化學成分將使用矽作為陽極材料，與現時市面上大部分電池相比，呢種材料能更加顯著提升電池嘅功率密度，更小嘅體積能輸出現時電池同等能量，並且新嘅化學成分將降低電池嘅內阻，另到電池能量回收期間有更大嘅效益，同時亦增加快速充電嘅性能。除此之餘，官方仲介紹Cellforce電池芯擁有良好嘅耐高溫性能，喺賽車運動中非常實用。而新型高性能電池嘅陰極則採用BASF化學公司專門為高性 能電池提供高能量嘅HEDTM NCM陰極材料，可實現快速充電同埋高能量密度。

據Customcells首席執行官Torge Thönnessen表示，計畫中生產工廠每年嘅產能目標喺達到至少 100 兆瓦時，相當於生產1,000輛電動車嘅高性能電池。而初始生產嘅新型高性能電池將率先投入Porsche賽車運動當中，呢項技術必定能大大提升賽車嘅性能，令人十分之期待Porsche Le Mans三连冠賽車—— 919 Hybrid 搭載新型高性能電池後將發揮出點樣嘅表現。