Lego Sián FKP 37猶如叢林蟒蛇般兇猛

近日，林寶堅尼連同Lego集團通力合作，使用超過400,000 Lego Technic™積木打造出一架1:1大細嘅Sián FKP 37車型，繼早前雙方合作推出1:8 Lego Technic™ Lamborghini Sián FKP 37之後又一力作。新車各項比例完美繼承Sián相同數據，車身由複雜定制六邊形Lego Technic™積木所組成，猶如叢林蟒蛇嘅鱗片，睇落去十分兇猛。而定制六邊形Lego Technic™積木亦致敬Lamborghini設計語言，型格十足。除此之餘，新車使用過150種不同類型嘅Lego積木所組成，其中20種喺Lego集團專門為新車定制。

從設計到組裝，新車花費兩間公司嘅15名工程師及技術人員共8660個小時精心打造，唔好睇部車係積木製成就失去氣勢，新車繼承Sián氣勢十足嘅頭尾燈，並安裝有實車輪胎，外型望落去同針車完全冇分別。除咗真實嘅外型，車內還原度亦十分逼真，團隊為新車配有Lamborghini標誌性飛機按鈕之餘，引擎制亦突出品牌設計精髓。現時官方並沒有公布新車價錢，一定有唔少有能力嘅朋友希望將部車揸翻屋企，以之前Bugatti同埋Lego集團嘅合作經驗來睇，喺未來Lego Technic™ Lamborghini Sián FKP 37好大機會將安裝動力系統，成為一架真實超級座駕。