Hyundai全新i20 N Rally2即將亮相比利時Ypres拉力賽

早前，Hyundai Motorsport Customer Racing已經向客戶車隊交付咗第一輛全新i20 N Rally2，即將係下星期比利時Ypres拉力賽首次出站。作為Hyundai Motorsport Customer Racing打造嘅第二款拉力賽車，i20 NRally2係根據道路版i20嘅模板而設計，深刻吸取上一代i20 R5設計優勢，為客戶深度訂造適合車手嘅全地形拉力賽車。

官方為新車打造咗一套非常強勁嘅賽車套件，充分考慮空氣動力學之餘，寬體設計更顯新車嘅獨特之處。Hyundai Racing一直係拉力賽車場上調教底盤嘅好手，根據上代賽車嘅經驗，新車強大底盤可以適應任何路段，就算沙石或泥土路段，亦無法阻擋i20 N Rally2前進嘅步伐。

除咗性能，可靠性亦係新車主要考慮嘅因素，自2020年首次試車以來，i20 N Rally2經過長達3,000公里嘅測試駕駛，相信拉力賽車最重要嘅可靠性，新車洗係呢點上亦毋庸置疑。屆時，i20 N Rally2將由HMCR初級車手Oliver Solberg同埋Jari Huttunen，駕駛呢部新車係WRC 2 級比賽中首次亮相。