Ferrari推出全新296 GTB插電混動超跑

6月24日，Ferrari冇預警哋推出咗一款全新中後置引擎連插電式混合動力系統嘅全新跑車296 GTB。作為Ferrari第一款量產V6車型，新車命名以車輛嘅引擎總排量加上Ferrari最為優秀傳統嘅Gran Turismo Berlinetta字母縮寫組成。搭載Ferrari多年嘅賽車運動經驗及技術之餘，Ferrari更加為新車度身定做高性能Assetto Fiorano 套件，同埋享受新車七年保用。

唔好以為Ferrari得翻六個氣缸動力就大幅降低，新車採用V型120度六缸Turbo引擎連電機驅動總成，可輸出830匹馬力，完全超過Ferrari旗下V12旗艦車型812 GTS。除咗動力超班，新車嘅電機系統非常值得關注，Ferrari放置咗一部 MGU-K 電動機於新車嘅引擎同埋波箱鏈接位置，通過擺放於座椅下側嘅高壓電池供電，瞬間可釋放出315 Nm扭力，而電機瞬間最大扭力亦賦予新車極快嘅起步速度，相信新車0至100k/h加速絕對能進入3秒大關。

除此之餘，新車嘅外型絕對喺亮點之一，車頭大燈十分神似Ferrari另一款GT跑車Roma，前機蓋平滑嘅弧線形設計猶如一把銳利嘅風刀，非常具有衝擊感，鬼面罩兩側嘅雙邊散熱開口設計充分利用車頭氣流，為波箱同前胎剎車迫力提供通風冷卻。車尾依然有Ferrari中置引擎標配玻璃引擎罩，可以非常直觀咁望到成個V6引擎，並且車尾仲有一條細長嘅小型尾翼，提升車輛整體感之餘，可以為新車喺高速時增加更多穩定。單出排氣亦喺新車嘅另一大亮點，睇落去非常具有科技感，而排氣下方嘅後擴散器相比其他Ferrari車型亦更加寬廣，能更好嘅發揮出地面效應從而增加新車嘅下壓力。