硬派外觀+獨立懸掛，呢台Haval全新SUV個性十足

近年來，內地硬派越野市場愈發紅火，其中長城汽車旗下嘅坦克300以交付8萬多台嘅成績，佔據市場嘅5成以上，並且仲有上升嘅趨勢。作為長城汽車旗下另一大越野車品牌Haval亦借助集團優勢，推出狗狗系列SUV，最新作Haval酷狗主打5座車型，以New Defender同理念嘅承載車身，加上獨立懸掛，打造城市越野多用途SUV產品。

講到外觀設計，新車車身橫直線條硬派十足，平直鬼面罩加上復古圓形大燈，有種舊派設計感，四個車胎上嘅防擦輪眉以啞黑色點綴，非常有越野元素。雖然車身唔大，只有4520mm，但喺2710mm嘅軸距讓新車車內空間唔會侷促，並且四個車胎更接近車身四個角，符合現今主流設計理念，擁有更好嘅操控性。

從向內地車管所申報嘅新車資訊中得知，新車將採用1.5T渦輪引擎，最大功率輸出可超過180匹馬力，搭配雙離合波箱同埋四驅系統，相信新車喺國內走量硬派越野市場可以打下一席之地。