top of page

的骰X環保X躍動:Hyundai Kona Electric初體驗



話說近排有乜抵澳電動新車值得期待,要講當然係全新Hyundai Kona Electric啦,新車作為電動四門SUV,主打實用性能,在澳門彎多路窄嘅市區將表現如何,咁啱有個機會,啤啤咔嘅輝哥連同佢經驗豐富嘅現代車行朋友阿Ken,一起為大家搶先體驗 !

全新Kona Electric繼承新款Kona車頭設計,頭泵把採用同一顏色,非常平滑,讓人感覺十分切合電車主題。全新設計的三間鯊魚鰓頭燈造型非常有辨識度。車尾指揮燈亦採用三間造型,首尾呼應。相比起普通SUV,全新Kona Electric車身相對較短,只有4.2米,行駛澳門街道就十分適合啦,特別係遇到啲橫街窄巷嘅停車位,亦能非常迅速泊車入位。

呢部全新Kona Electric喺馬力及續航力上面,相比上一代車型更有優勢,39.2kW高壓電池,可為全新Kona Electric提供312公里續航,一個星期充一次電都夠曬用。使用標準Combo2充電,只需約6小時即可為全新Kona Electric插飽電,而車主選擇100kW快充插電,約47分鐘即可將電池充至80%,只需一個lunch嘅時間,新車電量就可恢復至最好表現。車頭電機引擎可輸出最大136匹馬力和40.3kgm,扭力比普通汽油車大好多,令到起步十分迅速,讓人十分期待全新Kona Electric擁有如何的駕駛感受。

試駕當然要交比輝哥同阿Ken,而且佢哋仲有特別任務嘅,導演一早就為輝哥同阿Ken安排咗「大信封」,希望兩位駕駛呢部全新Kona Electric,限定時間60分鐘之內去唔同嘅舖頭買早餐,而三間舖位於澳門同氹仔各處,駕駛里程相當於繞成個澳門一周。睇完信封內容,兩位簡直雙眼發光,可以揸架新車體驗曬澳門各地唔同路況之餘,仲有好嘢食,當然話不多說即刻出發。

三間食肆分別位於司打口、關閘同埋舊澳大,揸住呢部全新Kona Electric穿梭係城區街道中,上斜又落斜,又有石仔路,輝哥直言真係幾好用。當然,一切功勞需要歸功於新車嘅懸掛系統,能喺多變嘅澳門街道上及時反應,唔會好似普通SUV咁有浪車嘅感覺,非常扎實同舒適。其次,因為電動車電池擺放位置於車底,令到整車嘅重心都降低咗,以小型SUV來講駕駛感受及操控都十分直接。

雖然有啲朋友可能覺得呢部車嘅電子設備可能唔夠多,但係輝哥覺得冇咁多電子設備未必係壞事,愈多電子設備輔助只會令到駕駛者與車輛溝通減少,好似輝哥咁鐘意駕駛嘅車主,未來如果想揀一部全電小型SUV,全新Kona Electric都會係唔錯嘅選擇。

完成澳門區嘅任務之後,當然喺要過氹仔,136匹馬力行西環橋完全冇難度,電機引擎嘅輸出特性,讓全新Kona Electric嘅動力輸出十分連貫,較低嘅風阻系數係過橋嘅途中亦有發揮,保障駕駛。

話咁快三間早餐舖都光顧曬,雖然超時10分鐘,但係連續駕駛後,認真測試到新車電池電量依然堅挺及其實用性。而架車比輝哥第一個感覺就係好靈活,雖然車仔細細,但係加速十分好力,各樣嘢反應都好靈敏,咁詳細嘅駕駛感受,相信大家更加了解全新Kona Electric嘅各項細節,想試駕嘅朋友,可以前往氹仔奧林匹克大馬路681號雍景灣地下D及E鋪Hyundai Macau預約試駕啦。


Commentaires


bottom of page